AL HAFIZ MUHAMMED SHAKIR ABRARI AL QASIMI

ശൈഖുൽ ഇസ്‌ലാം മൗലാനാ അസ്സയ്യിദ് ഹുസൈൻ അഹ്‌മദ് മദനി: വിജ്ഞാനത്തിന്റെയും വിപ്ലവത്തിന്റെയും ഇതിഹാസം മദീനയിലെ പരിശുദ്ധ മസ്ജിദുന്നബവിയുടെ തിരുമുറ്റത്ത് വിജ്ഞാനത്തിന്റെ പ്രകാശം പരത്തിയ പണ്ഡിത ജ്യോതിസ്സ്... ആത്മീയതയുടെ നാല് മഹാധാരകളെ (ഖാദിരിയ്യ, ചിശ്തിയ്യ, നഖ്‌ശബന്ദിയ്യ, സുഹ്‌റവർദിയ്യ) ഉള്ളിലൊതുക്കിയ ആത്മീയ ഗുരു... മാൾട്ടയിലെ തടവറകളിൽ ബ്രിട്ടീഷ് സാമ്രാജ്യത്വത്തിന് മുന്നിൽ പതറാതെ നിന്ന പോരാളി... മൗലാനാ ഹുസൈൻ അഹ്‌മദ് മദനി (റ) എന്ന നാമം ചരിത്രത്തിൽ അടയാളപ്പെടുത്തപ്പെട്ടിരിക്കുന്നത് സമാനതകളില്ലാത്ത ത്യാഗത്തിന്റെ പാതയിലാണ്. അധികാരത്തിന്റെ ചെങ്കോലും കിരീടവും കാൽക്കൽ വച്ചുനീട്ടിയ ജവഹർലാൽ നെഹ്‌റുവിനോട് വിനയപൂർവ്വം 'വേണ്ട' എന്ന് പറഞ്ഞ്, ദാറുൽ ഉലൂം ദയൂബന്ദിലെ 'ദാറുൽ ഹദീസി'ലിരുന്ന് പ്രവാചക വചനങ്ങൾ പകർന്നുനൽകാൻ നിയോഗം കണ്ടെത്തിയ മഹാനാണദ്ദേഹം. തന്നെ തേടിയെത്തിയ കേന്ദ്രമന്ത്രി പദവിയിലേക്ക് മൗലാനാ അബുൽ കലാം ആസാദിനെ നിർദ്ദേശിച്ച ആ ലാളിത്യം, അധികാര രാഷ്ട്രീയത്തിന് മുകളിൽ അറിവിനെ പ്രതിഷ്ഠിച്ച വിപ്ലവമായിരുന്നു. അറബികൾക്കും അനറബികൾക്കും ഒരുപോലെ പ്രിയങ്കരനായിരുന്ന അദ്ദേഹത്തെ 'ശൈഖുൽ അറബി വൽ അജം' എന്ന് ലോകം വാഴ്ത്തി. ആ ധന്യജീവിതത്തിന്റെ ഗരിമയും പോരാട്ടവീര്യവും അനാവരണം ചെയ്യുന്ന ഒരു അമൂല്യ ഗ്രന്ഥം.